Home 
Wa ko makasabot niining nahuna-hunaan sa atong mga kadagkuan sa Cebu City Government nga adto pagunahon sa South Road Properties (SRP) ang laing 15 ka mga CITOM personnel nga gikatakdang panaktakon sa serbisyo gawas niadtong unang 31 nga na-terminate na.
Unsa may atong ma-ani didto sa SRP? Dili ba pag-usik-usik sa kuwarta sa mga magbubuhis nga mag-suweldo kita ug mahal kaayo unya paingon ra sa way hinungdan ang ipa-trabaho?
Kun tinuud nga nangilkil, kinahanglang palagpoton dayon sa katungdanan kay dunay daghang gusto?ng mopuli.
Dili gyud maayo?ng dugayon sa serbisyo kining mga mangilkilay basta lang segurado gyud nga dunay ebedensiya sa ilang mga kabuang ug gihatagan ug substantive due process ang mga respondents.
Kining pagka-alanganin sa taga City Hall sa pagpanaktak, nagpasabot ba kini nga wa pa sila?y konkretong ebedensiya batok sa 15 ka mga traffic enforcers?
Gani akong nahibaw-an karong bag-o nga duna nay pipila sa mga nataktak nga modangop sa Ombudsman aron ireklamo ang dili maki-angayon nga pagtangtang kanila sa serbisyo.
Bisan si kinsa man tingali ilabina kun inosente, mosukol gyud kun dili tinuud ang mga pasangil nga makadaot kaayo sa pagkatawo.
* * *
Kasagaran sa mga dagkung kaso nga didto sa Mindanao nahitabo, anaa dinhi sa Sugbu gipa-balhin basi sa kamanduan sa Korte Suprema ilabina kun media killing.
Tingali dinhi sa Sugbu gipanglabay tungod kay sobra ang ilang pagsalig sa atong mga mahistrado.
Gawas nga dili mahadlok ang pipila kanila unya mga kugihan sab kaayo.
Pero unsa ka andam ug unsa ka mahinangpon ang atong mga huwes kun anhi ang venue sa ubang mga kaso sa mga Ampatuan?
Dili kaha maglumba ug inhibit ang atong mga huwes sama sa kaso ni Ecleo?
* * *
Ang prosecution panel sa kasong parricide batok kang PBMA supreme master Ruben Ecleo Jr. moduso ug pormal nga mosyon sa kang RTC Judge Soliver Peras pagpakanselar sa gipiyansa nga usa ka milyon aron mabalik sa prisohan si Ecleo.
Sila si Atty.Fritz Quiñanola, Atty. Alfredo Sipalay ug Atty. Kitt Enriquez mitug-an nga karong simanaha nila iduso ang formal motion to cancel bail bond human ilang nakompirmar nga si Ecleo milansar pagka-kongresista didto sa Isla sa Dinagat Surigao Del Norte.
Kaniadtu gitugtan ni Judge Generosa Labra nga makapiyansa si Ecleo tungod kay nakonbinse ang huwes nga usa ka ?walking time bomb? si Ecleo tungod sa pagka-masakiton sa kasing-kasing.
Pero karon nga milansar si Ecleo nagpasabot kini nga gitunto lang gyud niya ang husgado.
Dili ba kini pagyama-yama sa atong judicial system?
* * *
Nagduda ko sa motibo ni Labangon Councilor Victor Miñoza Buendia nga midangop sa husgado aron pagbabag sa gikatakdang plebisito karong Sabado pagbuak sa Guadalupe ug Banawa-Englis.
Nganong karon pa man siya mopatim-aw? Gusto lang gyud niya?ng lawgawon kining maong proseso nga gipangandaman na sa taga Comelec ug sa mga pundok nga nagtinguha karon nga mag-create ug laing Barangay Banawa-Englis?
Asa man si konsehal Buendia dihang gipanday ni Congressman Antonio Cuenco ang Republic Act no. 9905 nga nag-lista sa iyang gipuy-an nga Rosalina Village nga nalakip sa Banawa ug dili sa Barangay Labangon?
Kun buot huna-hunaon pagkadaghan na?ng insidente nga ang kapitan sa usa ka Barangay o konsehal dili gyud actual resident sa maong Barangay.
Kun ang iyang gikahadlokan nga ma-disqualify na siya kun magpa-pili sa Labangon kay ang Rosalina Village masakop na sa barangay Banawa, iyang kuhaan ug sanglitanan ang akong nailhan nga mga pulitiko sama nila?ng City Councilor Jack Jakosalem nga lumad nga taga Dumanjug apan anaa dinhi sa dakbayan sa Sugbu nangalagad.
Bisan sa sitwasyon ni Atty. Hilario Davide III nga lumad nga taga Argao apan nahimo?ng City Councilor kaniadtu. Kini ug daghan pa.
Way apil ang mga opisyal sa Guadalupe sa pagpanglawgaw?
Gituyo kining petisyon sa konsehal kay konbinsido sila si Guadalupe barangay captain Eugenio Faelnar nga pildihon ang ilang ?No, to creation of Barangay Banawa-Englis??
Nganong ila pa man gyud ning pugngan nga klaro man sab nga dili na sila makahatag ug basic services ngadto sa kinabag-an nila?ng mga konstituwente?
