Usa pa sa tulo ang gikonbikto ug gisentensiyahan kagahapon ni RTC Judge Generosa Labra ug double reclusion perpetua niadtong pagtagod-tagod sa lawas sa mag-agaw’ng Eva Mae Peligro ug Gwendolyn Balasta.
Ang gikonbikto mao pa si Joseph Roy Cellar alyas Jojo Delos Reyes kay pormal na siya’ng miangkon sa krimen atubangan sa korte. Pabayron siya ug P200,00 ka pesos nga danyos ngadto sa kabanay sa duha ka mga biktima nga taga lalawigan sa Bohol.
Wa pa’y labot sila si Richard Gudelosao ug ang uyab ni Richard nga si Jean Antonette Medalle kay pulos mi-claim nga inosente gyud sila sa krimen taliwa nga dunay extra judicial confession si Richard sa linoog nga krimen niadtong July 4, 2008 sulod sa gitiponan nila ug puyo nga unit diha sa Block 3 Lot 4 sa Azienda Firenze Maghaway dakbayan sa Talisay.
Puwerte’ng sakita gyud sa mga nahingtungdang pamilya sa mga biktima kay ang motibo sa krimen mao ang kasilag ni Richard pagpatay ni Eva Mae nga iyang umaabot sister-in-law kay ang naulahi kanunay’ng mopahibawo sa mga kabuang ni Richard dinhi sa Pilipinas ngadto sa igsoon niini nga si Felix nga hinigugma ni Eva Mae.
Sa sobra’ng kompiyansa ni Felix nga nanarbaho sa gawas mitugot ra sab siya nga maka-ipon ug puyo sa iyang unit ang iyang igsoon nga si Richard nga nagumon sa drugas uban sa ka live-in nga si Jean Antonette ug sa iyang hinigugma nga pakaslanan nga si Eva Mae. Kadto si Gwendolyn nga ig-agaw ni Eva Mae naangin lang sa nahitabo.
Maayo unta nga dili dugayon ang promulgation nilang Richard ug Jean aron mahingpit na ang hustisya sa pamilya sa mga biktima.
* * *
With all due respect sa kampo nila ni Atty. Ram Villagonzalo ug Atty. Anna Luz Cristal mas maayo tingali nga mo-advice sila sa ilang mga kliyente mga mo-submit nala’ng sa full blown trial sa korte kun inosente gyud sila sa kasong pagdagit ug pagpatay sa bata nga si Ellah Joy Pique.
Paglangay-langay ra gyud sa kaso kini’ng ilang pag-kuwestiyon sa gi-isyu nga search warrant ni Executive RTC Judge Mienrado Paredes.
Kun buot huna-huna-on gasto pa kaayo kini’ng ingon ani nga sitwasyon nga kada lihok sa mga pulis dayo’g pangiha ang kampo nilang Bella Ruby Santos ug Ian Charles Griffits.
Kagahapon ang gi-umol nga three-man panel investigating team ni Acting Cebu Provincial Prosecutor England Joseph Berciles nagkatigom na kun unsay angay nila’ng himoon sa kaso batok sa mga supetsado.
Ang mga naglangkub sa panel of investigators mao sila si piskal Jose Edwin Renegado, piskal Anabelle Robles ug piskal Ma. Luisa Ong.
Sila si piskal Renegado ug piskal Robles mitug-an kanako nga mo-isyu pa sila ug subpoena aron patubagon sulod sa napu ka adlaw sila si Bella ug ang uyab nga Briton.
Sa naandan humanon sulod sa 60 ka adlaw ang pagpahigayon ug preliminary investigation.
* * *
Alarming na gyud karon ang pagpanulis sa mga taxi drivers dinhi sa dakbayan sa Sugbu.
Niadtong Lunes sa sayong buntag nakit-an nalang ang patay’ng lawas ni Victoriano Dela Cerna didto sa Barangay Pulangbato nga nagbuy-od human gitulis, gipusil ug giilogan pa sa iyang taxi unit.
Si Victoriano driver sa Kevin Mitz taxi residente sa Barangay Tinubdan lungsud sa San Fernando.
Ako’y nalooy sa manghod sa biktima nga si konsehal Hermae Dela Cerna kay kadtong biktima puwerte’ng kayod kay maoy gisaligan sa iyang mga apo.
Makapalugmaw kaayo ang gisugilon sa manghod nga dunay usa ka apo sa biktima nga wa gyud mopaso niadtong Lunes kay maoy sulti sa bata nga di gyud siya motongtong sa stage kun di ma-uli ang iyang apuhan nga taxi driver.
Sa laktod nga pagka-estorya nahurot nalang ang oras pagpina-abot sa apo ug wa gyud siya mopaso kay ilang nahibaw-an pagka-hapon na sa Lunes nga nakit-an nalang patay ang biktima.
Ambot lang kun masulbad ba kini’ng maong krimen sa atong mga tinugyanan sa balaud?
* * *
Unsa man gyud ka seryoso ang plano nga ang mga basura dinhi sa dakbayan sa Sugbu adto ilabay sa Balili Property sa Barangay Tinaan dakbayan sa Naga?
Mga residente sa Tinaan Naga mipadayag na ug mga pagsupak sa plano ug gani mag-rally sila uban sa mga opisyales sa Barangay aron babagan kini’ng maong tinguha.
Alang nila nga dili gyud kini maki-angayon kay ang Tinaan ilabina duol sa Balili Property usa ka residential area ug daghan sila’ng maapektahan.
In fairness sa mga residente dili gyud lalim nga magpuyo ug lugar nga hilabihang baho-a.
Luoy sab baya sila kay may coal ash pa unya karon basura na sab. Paet!