Wa dawata ni Castro ang iyang suspension order

May pagkabakakon gyud ni si Piskal Mary Ann Castro kay sa iyang text kagahapon sa akoa miklaro kini nga wa siyay kasayuran nga gi-serve sa iya personal ang three-month suspension order nga silot batok kaniya gikan sa Ombudsman nga gipatuman ni Justice Secretary Leila de Lima.

Ang tinuod mao nga niadtong Biyernes (May 6) sa udto gi-serve ang suspension order sa process server ni City Prosecutor Nicolas Sellon nga si Benjared “Benjie” Empuerto.

Pag-abot ni Benjie sa panimay ni Piskal Castro sa Hacienda Milan sa Lawa-an dakbayan sa Talisay, wa moatubang kaniya si Castro kay giingon nga naligo.

Ang miatubang ni Benjie mao ang anak sa piskal ug amahan niini ug igo rang mibilin og istorya si Castro nga pabalikon lang si Benjie sa ilang opisina sa piskaliya kay mo-report ra siya ug iyang dawaton personal ang suspension order sa iyang cubicle sa Cebu City Prosecutor’s Office.

Apan tungod kay wa gyud mo-report si Castro pagka-Biyernes sa hapon, gibalikan ni Benjie si Castro sa iyang panimay apan wa na siya pasudla sa gwardya kay maoy mando ni Castro ug gani, matud pa, pwerteng pangasaba ni Castro sa mga gwardya sa ilang subdivision kay nagpasagad lang matud pa pagpasulod kaniya nga process server.

Mibalik ang process server sa panimay ni Castro niadtong Lunes (May 9) sa udto, apan wa na siya molawos kay giingnan siya sa gwardya nga way tawo sa panimay sa piskal.

Hinuon, iyang gibilin ang suspension order ni Castro ug gidawat ni security guard Crispin Arrogante uban sa instruction nga ipahatud ngadto sa piskal.

Si Castro mipasabot nga nagpaayo pa siya sa iyang sakit pagkakaron gikan nga nibakasyon sa Boracay.

Iyang giklaro nga nag-sick leave siya karon ug matud pa mo-file siya og pormal nga sick leave human sa iyang pagpa-alim ug under observation pa siya sa iyang doctor.

Iyang giklaro nga dili gyud siya aware sa suspension order ug wa pa gyud siya makadawat.

Pipila sa iyang text nagkanayon nga, “I have not refused any legal process. I still believe that I have legal right to combat unjust orders and grave oppression.”

Dugang padayag ni Castro, “jz imagine dat d kort acquitted me already. D ombud admitted dat annulment fyling s private n has nothing to do wd my being a public officer. Wat s dr basis then of adjudging me 4 MISCONDUCT? To d public, wat do u kol ds?”

With all due respect ngadto ni Castro, dili siya makapugong sa suspension order gikan sa Ombudsman nga gipatuman sa ilang boss nga si Secretary De Lima.

Maayo unta kun naka-una pa siya pagkuha og restraining order sa higher courts. Unsaon man niya kini pagmaniobra nga duna may mga memorandum ug direktiba nga di na siya paguniton ug mga kaso?

Ayaw kog ingna nga sublion ang sayop sa Cebu City government kaniadto nga mohatag gihapon og monthly allowance kang Castro bisag suspendido?

* * *

Pagka-delikado baya sa mga estudyante kun dunay linog, sunog ug ubang dagkung kalamidad nga mo-igo sa onse ka mga pampublikong tunghaan dinhi sa dakbayan sa Sugbo nga gipublikar dinhi sa Cebu Daily News kagahapon nga kuwang sa hagdanan ug mga pultahan nga klarong nakalapas sa National Building Code ug Fire Code.

Ingon ani ka inutil ang taga gobyerno nga di mag-agi ug building permit ug inspection panahon nga gi-construct kining maong mga edipisyo?

Unsa man sab ka pulido pagkahimo kining maong mga building?

Ang rason nga limitado ang mga fire exit ug ubang mga emerhensya nga mga agi-anan tungod kay nagdaginot sa kwarta ang taga gobyerno.

Porbida gyud niining termino nga nagdaginot. Unsa may buot ipasabot sa taga gobyerno, ibutang sa risgo ang mga nag-okupar sa mga depektosong school building?

Nagdaginot lagi ug ngan, pero ang ilang bulsa napuno sa komisyon sa mga kontraktor.

Kinahanglang tutukan kini sa mga ahensya sa gobyerno aron matul-id ning ilang mga kabuang.

Angayng patilawon ug silot kadtong mga responsable pagbutang sa peligro sa atong mga tinun-an.

Kanyahay ra nga makit-an na lang ang pagpangliki sa mga semento ug pag-gitib sa mga kabilya taliwa nga bag-o pa tungod ning mga tinunto sa DepEd, DPWH ug mga iresponsableng kontraktor. Gabaan baya mo!