The devil, domestic

Nyor Daku (ND): Nakahibawo ka nganong nasakpan si Bin Laden?

Nyor Gamay (NG): Kanang kuan, Nyor, ang iyang fear of technology maoy nihatag og clue o sinyales sa taga gawas. Daku kaayo iyang pinuy-anan, dili karaan og hitsura, pero walay communication system. Walay Internet. Wa siyay Yahoo, YouTube, Youporn, Wikipedia, Wikileaks. Pagkalaay. Nagduda na nuong taga gawas nga may gilikay-likayan ang nanimuyo ning dakung compound sa Abbottabad, Pakistan.

ND: May punto ka. Pero dili gyud na maoy nakatumba ni Bin Laden.

NG: Wa tingali kaayo tubig ngadto, Nyor.

ND: Ha?

NG: Minus tingali ang tubig sa maong compound mao nga wa kini maka saka sa third floor diin nagpuyo si Bin Laden ug tungod niini wa siya makaligo hinungdan nga nasimhutan dayon siya sa iro nga gida sa Navy Seals nga giangaan na karon og “Special 6.”

ND: Ayaw pag sigeg hinanggaw diha Nyor.

NG: Murag mao na ni Nyor.

ND: Be, unsa man?

NG: Gireport ang compound sa mga basurero.

ND: Unsa?

NG: Wa man sila motuman sa balaod nga i-segregate ang malata ug di malata.

ND: Ha?

NG: Unsaon nga ang nanimuyo sulod sa Bin Laden compound dili man mopaguwa sa ilang basura kay sila ra may magdaub-daub. Di nahiubos ug nagduda na hinuon ang mga basurero nga naa silay tinaguan.

ND: Gapunay ka lag inamaw, Nyor, da.

NG: Unsa man diay Nyor?

ND: Natintal siya niining the Domestic Devil.

NG: Sine na, Nyor? “The Devil is Domestic”?

ND: Sine? Ah, nakahinumdom ka niadtong “The Last Temptation of Christ”?

NG: O Nyor. Sa DVD ra ko kita.

ND: O unya, unsa man tong gigamit sa yawa pagtintal ni Kristo nga dariyut magamalampuson? Ang bahandi ba ug kabtangan?

NG: Dili, Nyor.

ND: Ang gahum ba?

NG: Dili, Nyor. Unsaon man nang Kristo ang gahum? Kun wa ko makalimut sa maong pelikula, nagmalampuson og kadiyot ang yawa dihang gihaylo niya si Kristo pinaagi sa usa ka batang anghel nga babaye og usa ka hamugaway nga pagpuyo uban sa usa ka pamilya sulod sa usa ka panimalay.

ND: Mao kana, Nyor. Ang demonyo nga makahugno sa usa ka rebolusyunaryo ug Messiah mao ang tentasyon sa usa ka hamugaway nga pagpuyo uban sa usa ka banay. Mao kini ang domestic evil nga makapahabol sa usa ka hait nga rebulosyunaryo. Unya, Nyor, nakahinumdom ka adtong mga gidudahang rebeldeng batan-on sa bukid sa Bohol?

NG: O kadtong nasakpan tungod sa aso sa ilang giluto nga humba og mao nga gi-strafing silas eroplano sa militar.

ND: Ang nagtukmod nila pagpangita sa kinhaham nila nga humba nga ilang makaon sa ilang gibiyaan na nga panimalay mao ang domestic nga yawa.

NG: Unsa may connection ani ni Bin Laden?

ND: Mibiya sa langub si Bin Laden ug mibalik na sa hamugaway nga panimalay. Miinum na siyag Coke ug Pepsi. Mipuyo na uban sa iyang mga anak ug apo. Hinay-hinay nga nawa ang iyang kahait isip usa ka warrior. Gilamoy siya sa domestic devil ug nahimo na nga semi-retired lolo. Usa tingali kini sa rason ni San Pablo niadto kun nganong di niya paminyuon ang pari kay basig mawala ang kaigmat niini kon ma-domesticated na kini. Daw makuhaan kinig gahum.

NG: Sa ato pa, Nyor, nawagtang ang iyang kaigmat tungod sa domestic devil?

ND: Amen.