Home 
Kon seryoso ka na sa imong pagka- maniniyot, duha sa mga butang nga imong pangitaon sa usa ka camera mao ang abilidad niani pagkuhag detalye ? kunot sa agtang, balhibos ilong ug ang kapasidad niani sa ngitngit diin aduna gihapoy kolor nga makita bisag ngiob na ang lugar nga nanguha kag hulagway.
Kasagaran ang daghanay sa detalye daugon sa MP o megapixel. Basta hayag lang, mas daghang detalye nga makuha ang camera nga daghag megapixel. Apan kon mo sugod na galig kangitngit daw maapikhan ang mga camera nga dagkug megapixel. Daw hugaw og lumuton ang ilang mga kuhang imahen, labi na sa dapit diin may anino.
Ang panindutay og kuhag hulagway sa ngitngit diin walay flash nga gitugutan (sama sa ballet ug drama) mao karoy gikumbati sa mga dagkong kompaniya sa mga camera. Karong tuiga, Canon ang maayong laki. Sunod tuig Nikon na sad. Dayon ang Canon na sad. Nagpulipuli lang kining duha ka dagkong kompaniyang Hapon sa camera sa pag-indigay sa ilang abilidad sa ngitngit.
Nahimuot na lang ako dihang nabasahan ko sa inila ug respitadong photographic review site sa England nga www.dpreview.com nga dili na gikan sa Canon ug Nikon ang bag-ong kampyon sa kuhaay og hulagway sa ngitngit. Sa ilang katapusang artikulo sa wa pa sila mobakasyon para bag-ong tuig, nagkanayon ang mga reviewer sa maong site nga ang Pentax K-X na karon ang pinakamaayo nga camera sa ngitngit. Nagkanayon ang maong review nga dili na mabangbang kining maong camera.
Ang lain pa nakong nahimut-an kay sa artikulo sa Wikipedia (laing internet site) kabahin sa Pentax K-X gibutang niini nga ?made in the Philippines? kining maong camera. (Sa ingon nga dunay mga Nikon D90 nga made in Thailand ug Canon nga made in China.) Ug nasayud kita kon diin dapita sa Pilipinas gihimo kining mga camera sa Pentax. Gihimo kini dinhi sa ato. Sa isla sa Mactan. Ug ang mga trabahante nga gahimo niani mao ang atong mga kaigsuonang Bisdak nga sakop sa assembly line.
Angay nga ma-proud kita niini. Sama sa ka-proud ni kanhi Presidente Fidel Ramos sa iyang Timex nga relo. Dihang gisugsug si Ramos kabahin sa iyang relo, nasuko kini ug miingon: ?Puro lang kayo pamimintas? eh, gawa sa atin to!? Ang Timex, sama sa Pentax, naa usab buhata sa Mactan, sa MEPZ.
Ang Pentax K-X lahi sa ubang DSLR camera sa ingon nga dili lang itom ug silver ra ang kapilian nimong kolor niini. Duna kini red, blue ug white nga edition. Gani duna man kini special edition (100 copies only) sa Japan nga daw Philippine flag ang pintal. Dunay pula, asul, dalag ug puti ang hitsura niini apan walay adlaw o bituon. Inspired kuno kini sa usa ka robot mao nga dunay drawing nga nawong sa pop-up flash niani. Basin bayag tribute usab kini sa Pentax sa mga Pinoy Bisdak workers nga nag-assemble niani.
Dili ra diay lechon baboy ang ikapanghambug sa mga Bisdak sa tibuok kalibutan nga gikan sa Cebu. Duna usab kitay gitara (nga acoustic), relo ug karon, camera nga world-class leader ang abilidad sa ngitngit. Asdang Bisdak!
