Home 
Daghan na?ng hitabo nga nadisgrasya ang mga boxers sulod sa ring o ba kaha human sa binukbukay taman sa ginhawa.
Ang uban nga maabtan sa dimalas dead-on-arrival sa hospital samtang ang uban adto sa ospital makabsan sa kinabuhi.
Ang uban maluwas man tuod sa kamatayon apan inutil inig gawas.
Sa nahitabo ni Z Gorres?, manghinaut ko nga maka-survive siya sa brain injury ug maalim siya sa hingpit nga matud pa ni Antonio Aldeguer nga stable na ang kondisyon sa Sugbuanong boksingero nga atua karon nalandig sa University Medical Center sa Las Vegas U.S.A. human sa iyang kadaugan niadtong Biyernes batok kang Luis Melendes.
Mangambot lang ko niining nahitabo ni Z Gorres? kun tabangan ba gyud sa hingpit sa gobyerno. Ambot lang sab kun duna ba?y komprehensibong programa ang gobyerno pag-protihir sa atong mga boksingero human sila gi-exploit.
Kaniadtu pa ko nakadungog niining yango-ngo sa mga boxers nga way klarong tabang nga makuha gikan sa gobyerno.
Kaniadtu sab dunay mga pasangil nga ang mabulahan sa kuwarta panahon nga dunay boxing mao ra gyud ang promoter ug ang manager sa boksingero.
Suwerte si Manny Pacquiao sa iyang panahon kay wa siya magpadala sa pagka-bintahoso niining mga tawo?ng nagpahimolos sa ilang profession.
Bintaha si Manny sa ubang boksingero kay anaa ang makabungog nga suporta gikan sa gobyerno ug sa mga politiko nga naglumba ug kabayo sa iyang kasikat sa tibuuk kalibutan pagkakaron.
Pero ambot lang kun dimalason si PACMAN kun magpadayon siya sa boxing. Naa pa kaha?y mokabayo ug mopahimolos?
Sa atong mga kongresista ug mga senador, nakapalabang ba gyud ug mga balaudnon pag-protihir sa atong mga boksingero ug sa mga atleta?
* * *
Samtang nagkaduol na ang Pasko ug Sinulog dinhi sa atong dakbayan sa Sugbu dili kalikayan nga daghang mga dayo nga mo-abot dinhi sa ato. Ang uban nangabot na.
Mao nga kinahanglang doblehon sa atong kapolisan ang pag-monitor sa mga dayo ug kinahanglang abagan sila sa katawhan ilabina sa mga opisyales sa barangay.
Pagkakaron atong makita sa kadalanan kining mga batan-on nga manaygon sa mga pasahero sa mga PUJ.
Ngan lagi nga ipatigbabaw ang diwa sa Pasko mao nga dili kalikayan nga dunay mga pasahero nga mohatag taliwa nga duna kita?y balaud nasyonal ug local nga nagdili sa paghatag nga mao kini?ng gitawag nga Anti-Mendicancy Law ug Anti-Mendicancy Ordinance. Buot ipasabot nga kinsa kadtong mohatag sa mga manglimos ug kadtong manglimos parehas nga pamoltahon. Pero wa pa ko makadungog nga dunay mihatag nga gidakop.
Ang nakaporke lang kay dunay ubang batan-on nga plantalya lang ang pagpanaygon sa mga PUJ apan ang tinud-anay nga katuyuan mao ang pagpang-labni sa mga mahalon nga mga butang sa mga pasahero.
Si Cebu City Councilor Gerardo Carillo nga maoy nagpanday sa local ordinance mipadayag sa among programa sa DYSS ?Dialogue On The Air? nga kuwang gyud kaayo ang implementasyon niining mga balaura.
Bisan si Cebu City Police Director S/Supt. Patrocenio Commendador mi-angkon sa alegasyon ni Carillo. Matud niya nga tungod sa kakuwang sa mga pulis, duha ra gyud ang iyang gi-assign pagtabang sa pag-rescue niining mga batan-on.
Gawas niini, ang nasinati?ng problema sa mga manakupay mao nga ang mga bata nga dakpon mabalik ra gihapon ngadto sa mga iresponsable?ng ginikanan kay way center alang kanila. Ang mahitabo magbalik-balik diha sa kadalanan nga risgo gyud kaayo.
Si Emma Patalinghug sa DSWD-7 mi-angkon nga problema pa gyud kaayo ang kasamtangang kapuy-an sa mga bata nga ma-rescue.
Kun mao kini?ng kalakiha mas maayo tingali nga suspensohon ang implementasyon pagdakop sa mga magpakalimos sa kadalanan kay salikwaot sab kaayong paminawon nga manakop kita niining panahon sa Pasko nga mao ang paghinatagay.
Magbantay lang ta niadtong mga sagbot sa katilingban.
* * *
Makalingaw kini?ng away nila ni Provincial Prosecutor Pepita Jane Petralba ug Assistant Regional State Prosecutor Vicente Mañalac.
Sa akong interview ni Mañalac, dili tinuud nga mi-abot ug upat ka adlaw ang kapakyas niya pagpawong sa ceiling fan sa iyang cubicle. Matud niya nga usa ra gyud ka adlaw.
Samtang iyang gipasabot nga way anomaliya ang pag-isyu niya ug subpoena ug summons niadtong mga utangan gamit ang letter head sa opisina ni Petralba kay apil kini sa iyang trabaho isip action officer sa programa ng Department of Justice Action Center kon DOJAC.
Apan si Petralba miingon nga kining DOJAC ma-isip nga susama kini sa legal aide program sa IBP nga di na kinahanglan nga mo-isyu ug summons ug subpoena.
Alang nako mas maayong imbestigahon kini ni Regional State Prosecutor Fernando Gubalane aron maklaro kining tanan.
