Home 
Basta gani kalagkalag naa dayuy mga istoryas abatabat. Ambot, di man unta synonymous ang kalag ug ang abat. Tingali kay puros sila “dili ingon nato.” Puros gikan sa mga kalibutan nga tago nga dili makit-an kada adlaw. Pero nganong naapil man sa ungoungo ug abatabat ang kwaknit?
Tingali tungod kini kay duna may kwaknit nga mamaak ug kuno mosuyop ug dugo. Gihinganlan kini og vampire bats. Duna usay kwaknit nga vegetarian kay di man kini ganahag dugo ug gihinganlan kinig fruit bat, kay prutas may kinaon niini.
Ang kwaknit ug ang abat puros man molupad ug mamaak og tao mao tingali nga gi tipon sila sa usa ka pundok. Apan nisamot ug ka kusog ang imahen sa kwaknit pag abot ni Dracula, ang suave ng ungo, ang disinting abat. Dili parehas sa abat nga pataka lang panasmag ug pamahit, pahimutang ang lakang ni Dracula. Fashionista ug metrosexual kinis Dracula. Iya usang panguyaban ang babaye. Ug kon mauyab na niya ug magsugod na silag tinuhikay iya dayon kining paakon sa liog ug suyopan ug dugo. Tungod kay dugo may iyang tirada na associate siyas kwaknit ug dili sa maya, bisan pa man sa iyang pagka metrosexual.
Apan dili lang mga dautang elemento ang atong ma associate sa kwaknit. Naa pananglit si Batman. Si Batman usa sa pipila lang ka superhero nga walay gahum pero daghag gadgets. Kay di man mosuyop ug dugo si batman tingali usa siya ka fruit bat. Daghang niingon nga basig tuyab kini si Batman kay nganong hilig man kini mosul-ob og pinahuot nga sinina nga pinagawas ang brief ug magsiguig da og batan-ong lalake nga pina fitting sad ang gisul-ob nga si Robin. Dili ba kuno cross-dressers kining duha?
Sa dili pa kaayo politically correct ang kalibutan dihay binuang sa radio kabahin sa usa ka cross dresser o transvestite nga na kurat dihang gitirador sa mga ang iyang gihayhay nga artificial genital. “Hoy, piste mong mga bataa mo! Dili ni Kwaknit!” nagkanayon siya.
Ginadili na karon ang pag panirador ug pamusil sa mga kwaknit tungod kay gamay na lang sila.
Apan matud pas akong higala nga si Butch Bandillo, delicacy kuno sa Palau ang linat-ang kwaknit. Matud pa niya –“Ang tibuok kwaknit--ulo, panit, kuko, ginhawaan, tinai, tanan lagi--lat-an hangtod sayon na kaayong haploson ang panit.”
Misulod sa cueva sa akong bagulbagol ang kwaknit karong tingdagkut kay nakit-an ko man gud Yahoo Sports nga dunay kwaknit nga nakasulod sa AT&T Center atoll sa Halloween game sa San Antonio Spurs ug Sacramento Kings. Giundang kadiyot ang duwa hangtud mibiya ang kwaknit. Apan pagduwa nilag balik mibalik na usab ang kwaknit. Dihang misakdap sa iyang duol ang kwaknit gihapak kini ni Manu Ginobili (player sa Spurs) ginamit ang iyang walang kamut. Milukapa ang kwaknit sa hardcourt. Gipunit kini ni Ginobili ug gihatag sa security.
Tingali dili makagaba ang mga butang kwaknit kay midaug ang San Antonio Spurs batok sa Sacramento Kings sa score nga 113-94.
