Home 
Mituyo ko pag-adto mga pasado alas 11:00 sa gabii Sabado sa buhatan sa Comelec dinhi sa dakbayan sa Sugbu aron pag-obserbar sa dagan sa registration sa mga botante nga maoy deadline pagka-alas 12:00 sa tungang gabii.
Akong nakit-an nga nagka-gidlay gyud intawon ang atong mga personnel sa Comelec ilabina ang atong mga kadagkuan nga sila si Atty. Edwin Cadungog sa Cebu City South ug ingon man si Atty. Marchel Sarno sa Cebu City North.
Daghang nadismaya ug nagbagulbol kay wa ma-accommodate pun-an sa giingong way sistema.
Matud sa uban nga akong nahinabi nga alas 12:00 pa sila sa udto milinya apan wa na sila dawata kay na-igo sa cut-off.
Mas daghan ang reklamo sa South district kay langay ang pag-anonsiyo sa cut-off ug ni-ana na’ng mga alas 7:00 sa gabii ang pagpahibawo sa taas nga linya sa mga buot magpa-rehistro.
Samtang sa Cebu City North medyo hapsay gamay kay mga alas 2:00 pa sa hapon naghatag na sila ug cut-off. Buot ipasabot kadtong nakasulod sa cut-off mao ra gyu’y dawaton.
Apan segun sa akong mga naabtan nga apil sa panon nga nangindahay nga matagad sa taga Comelec, daghan gyud ang nanguli nalang kay wa maka-antos sa tumang kagutom.
Si Atty. Cadungog nangayo ug despensa sa mga nahasol. Iyang gipasanginlan ug daku ang ilang duha ra ka Data Capturing Machine (DCM) nga nagsige ug ka-hang tungod sa pagka-karaan.
Matud niya nga tungod sa technical defect langay gyud kaayo ang proseso ug mo-abot gikan sa lima ngadto sa walo ka minutos pag-process matag botante nga i-rehistro.
Dili sab mahimo nga modawat sila ug registration lapas sa alas 12:00 tungang gabii kay makasupak sila sa En Banc Resolution nga niadtong Sabado 12:00 midnight maoy deadline.
Alang ni Atty. Cadungog mas maayo gyud unta nga ang duha ka buhatan sa Comelec dinhi sa dakbayan sa Sugbu duna gyu’y tag-napulo ka mga “DCM” aron madali ang pag-pang-rehistro.
Sa habig ni Atty. Sarno mipadayag nga ang usa sa mabasol mao ang batasan sa mga botante kay kun dili magkaduol ang deadline sa registration dili magtikaw-tikaw sa pagpa-rehistro.
Mihatag ug mensahe si Atty. Sarno ngadto sa mga makabotar nga unta dili gyud usikan ang ilang katungod ug kinahanglang dili ibaligya ang ilang boto sa umaabot nga eleksiyon kay sakripisyo gyud kaayo ang pagpa-rehistro unya mawagtang lang ang pagka-sagrado niini kun magpa-palit.
Si Provincial Comelec Election Supervisor Atty. Lionel Marco Castillano nga amo sa’ng naatlan didto uban sa GMA-7 Balitang Bisdak nagtoo nga lisud na gyud nga dunay extension sa registration kay matud pa apiki na kaayo kay karong Enero mao na ang pagpang-imprinta sa mga balota unya dili sab kini sayon nga himoon tungod kay poll automation na kita.
Alang nako mas maayo gyud nga dunay extension aron kahatagan ug higayon kadtong wa ma-rehistro nga naghago pagbarug ug pipila ka oras.
Akong gi-recognize ang effort sa taga Comelec pagpahigayon ug off-site registration matag Barangay ug ubang mga lugar kaniadtu apan akong nakita nga kuwang pa gyud.
Kun di lang seguro makit-an sa mga buot magpa-rehistro ang tag-as nga linya diha sa Comelec masibot seguro ang tanan pagpa-rehistro.
Bisan sa akong kabahin dili ko ka-agwanta ni-anang paglinya ug taas nga puwerte’ng maka-usik sa atong oras ilabina nga duna ta’y trabaho ug mga obligasyon.
Pun-an pa nga nagsige kita ug brown-out sa mga nangaging mga adlaw.
Kun nakahatag ug extension ang taga Comelec sa ubang lugar nga naapektahan sa kalamidad way rason nga di sila kahatag dinhi sa Sugbu nga ang hinungdan mao ang ilang kakuwang ug DCM pun-an pa sa kakuwang ug sistema.
With all due respect sa akong mga amigo sa Comelec, dili seguro acceptable ang ilang gipangyawit nga apiki na kun dunay extension sa registration kini tungod kay anaa na kita sa estado karon nga high-tech na ang tanan.
Ayaw ko’g ingna nga nag-ayo lang sa panghambog ang taga Comelec niining poll automation unya sa registration pa lang daan sukarap na ta.
Way plano ang taga Comelec nga kun itugot man ang extension sa registration, ilang panghulaman kadtong mga DCM nga anaa sa ubang mga lugar ug ipadala dinhi sa Sugbu ug sa ubang mga key cities?
