Home 
Akong gipaabot ni Supt. Efren Nemenio, jail warden sa New Cebu City Jail – Bagong Buhay Rehabilitation Center sa barangay Kalunasan, ang gitug-an sa akong kasaligang tinubdan nga, matud pa, migrabe ang sindikato sa druga. Matud pa, diha na sa sulod sa BBRC ang transaction sa binayranay sa mga drug lord nga nangapriso. Gani, matud pa, minilyon ang kwarta sa mga drug lord diha sa sulod.
Wala man hinuon miderekta sa pagpanghimakak si Nemenio atul sa among programa niadtong Sabado apan iyang giklaro nga tag-P500 ra gyud ang itugot nga mahuptan nga kwarta matag piniriso. Matud ni Nemenio nga naningkamot gyud sila nga maka-greyhound operations kaduha sa usa ka simana ug duna pay mga surprise inspection matag silda aron mominus ang problema.
Nakapanglingo-lingo ko sa gitribukar ni Nemenio nga dunay babaye nga dalaw nga mipalusot og 30 ka ampules nga Nubain nga gisulod sa iyang kinatawo. Matud ni Nemenio nga kun wala pa silay nadawat nga intelligence report batok sa babaye, dili gyud unta kadto makuha nila.
Taliwa nga giistrikto ang pagpasulod sa mga cellular phones apan dunay mga piniriso nga nakahupot gihapon ug mobile phone. Gani ako mismo makadawat ko og mga text messages gikan sa mga piniriso diha. Miangkon si Nemenio nga bisag giunsa nila pag-istrikto ang pag-ban sa mga cellular phones apan duna gihapoy makalusot. Nakadawat usab siya og intelligence report nga dunay mga babaye nga modalaw nga mosud og tag duha ka cellular phone sa ilang kinatawo.
Matud ni Nemenio nga kining mga modalaw mangita gyud og paagi ug makigkonsabo sa mga salawayong mga jail personnel. Maglaum na lang ko nga magmalampuson si Nemenio sa iyang krusada diha ug matunhay ang pag-manage aron ibalik sa Cebu City government ang tanang mga tabang.
* * *
Wala ko kasabot kun nganong gipusil-patay si Cebu City Assistant Prosecutor Patrick Ian Osorio, nga akong kababayan sa lungsud sa Dalaguete. Sa akong pag-ila kaniya, usa siya ka buotan nga piskal ug hilumon nga klaseng pagkatawo. Lisud gyud kaayong tugkaron kay sa akong nahibaw-an gikan sa pamilya ug mga kaubanan sa trabaho, wala gyud kini makahipalag og kontra.
Makonsensya ra unta kadtong duha ka mga responsable sa gibyaang pamilya sa biktima nga gagmay pa kaayo ang upat ka mga anak ug nagbuntis pa ang asawa sa ikalimang anak. Kun makalusot man sa hustisya dinhi sa yuta ang mga responsable ug ang mastermind, segurado ko nga dili sila makalusot sa hustisya sa langit.
Akong nahibaw-an nga ang Task Force Osorio nakahipos na og upat ka mga testigo apan mga testigo nga pulos wala makakita sa dagway sa duha ka mga responsable tungod kay nakasul-ob og full-face or closed-type helmets atul sa pag-ambush sa piskal diha sa Maria Gochan, Mambaling, niadtong Jan. 6.
Salikwaot kaayong paminawon nga di makasulbad atong mga otoridad ilabina ang taga-National Bureau of Investigation sa kamatayon sa biktima nga miembro sa Department of Justice.
* * *
Si Bogo Regional Trial Court Judge Antonio Marigomen nabalaka karon pag-ayo sa iyang kinabuhi didto sa dakbayan sa Bogo tungod sa mga death threats nga iyang nadawat. Misamot ang kabalaka sa huwes dihang nahibaw-an niini nga dunay pundok sa mga armadong tawo nga gidudahang mga gun for hire.
Mitug-an sila si Atty. Briccio Boholst, presidente sa Integrated Bar of the Philippines Cebu City Chapter, ug Atty. Michael Yu, bise-presidente, nga nagpakitabang karon kanila si Judge Marigomen nga maaksiyonan gilayon sa Korte Suprema ang hangyo niini nga magpabalhin.
Si RTC Executive Judge Mienrado Paredes miingon nga karong adlawa magtigum silang mga huwes tungod niining seryosong mga hulga ni Judge Marigomen ug ilang suportahan ang tinguha niini nga magpabalhin tungod sa kainit sa pulitika sa 4th district nga maoy hinungdan.
Kinahanglang dili gyud mokompiyansa atong mga huwes, mga piskal ug mga abogado nga nag-private practice kay dili kalikayan nga dunay mga litigante nga maglagot sa resulta sa ilang kaso.
