Home 
Naunsa na man tawon ning taga-Ombudsman Visayas? Nawagtang na man ang ilang pagkaagresibo paggukod sa mga badlungon sa gobyerno. Resulta na ba kini sa away sa mga kadagkuan sa Ombudsman Manila?
Tungod sa ilang paltos napugos si Regional Trial Court Judge Simeon Dumdum pag-abswelto sa kontrobersyal nga pulis nga sakop sa kanhi Vice Control Section nga si SPO1 Jaime Otadoy sa iyang kasong robbery. Gitarong gyud og discuss sa pito ka pahina nga desisyon sa huwes nga damaging kaayo sa prosecution kadtong kapakyas sa Ombudman Visayas pagtaral og apil sa mga kaubang pulis ni Otadoy nga sila si PO2 Raniel Capangpangan alyas “Pangke” ug PO3 Roy Albotra.
Sa information sa kasong robbery batok ni Otadoy, naapil didto sa allegation nga ang naulahi nakigkonsabo nilang Capangpangan ug Albotra paghukas sa relo ug kwentas sa ilang dinakpan nga nalambigit og drugas nga si Reuel Lerio, kinsa miakusar sa mga pulis nga nangilkil kaniya og P2 milyones bugti sa iyang kagawasan.
Unsa man ni? Nalimtan? Nataligam-an? O ba kaha gituyo ni kay gipul-an na ang taga-Ombudsman pagpanggukod sa badlungon sa gobyerno kay duna say ila?
Manghinaut ko nga subayon kini nila ni Assistant Ombudsman Virginia Palanca Santiago kun asa dapita ang diperensya sa ilang pag-monitor sa mga kaso. Kun magpirme kini, mosamot kaubos ang ilang approval rating.
* * *
Lanog pas dugdog ang pagsupak sa kinabag-ang mga residente dinhi sa dakbayan sa Sugbu ang plano pagbaligya sa Cebu City Medical Center (CCMC). Manghinaut ko nga respetahan kini nila ni Mayor Tomas Osmeña ug ubang mga opisyales sa City Hall nga dili gyud kini nila ibaligya.
Akong nadunggan si City Councilor Christopher Alix, chairman sa committee on health, iyang gisuportahan kining pagbaligya sa CCMC, apan duna siyay alternatibong proposal nga medyo kinopya sa huna-huna ni Mayor Osmeña. Ang ilang gusto nga adto na gyud sa mga pribadong ospital nga mahalon magpatambal ang mga makaluluoyng kabus.
Si Mayor Osmeña dakug pagtuo nga ang PhilHealth card nga ilang gipang-apud-apud makaayuda. Pero pila ra man ang ilang nahatagan og card? Ang laing pangutana kun kaya ba sa syudad nga way putol ang coverage sa PhilHealth ang mga kabus diin ang syudad maoy mobayad sa premium o contribution?
Samtang si Konsehal Alix miingon nga ang tinuig nga budget alang sa CCMC, nga mobalor og P160 milyones, adto na lang ipundo sa mga private hospitals aron kini maoy kuoton alang sa mga kabus nga mga pasyente nga malandig. Kining paagiha maayo lang ni kun politically mature na ang atong mga magdumala nga hikalimtan dayon ang pulitika.
Unsay garantiya nga maka-avail niini ang mga kontra sa pulitika? Dili kaha kini hasol sa mga way alamag, pun-an pa sa grabeng bureaucracy sa gobyerno? Kun mahitabo man kining maong proposal, dili kaha hinuon mosamot kaalkanse kay posibleng abusohan kini sa ubang mga mapahimuslanong opisyal? Dili kaha mawani niini kadtong dili makamao mosipsip ug dili kapartido sa modumala sa City Hall?
* * *
Ambot kun kanus-a pa kaha kita makaangkon og mga lider nga susamag kinaiya sa mga Hapon nga mang-resign dayon sa pwesto kun makita nga ang ilang pagdumala makapatibugsok sa ekonomiya sa ilang nasud. Bilib ko ni Japan Prime Minister Yasuo Fukuda, kay bisag wa pa siya magtuig hulip niadtong iyang gisundan nga kanhi primero ministro nga si Shinzo Abe, moluwat na sa iyang katungdanan.
Dinhi sa ato, bisag duna nay mga panawagan nga modemiter sa pwesto ang Presidente kay nagpasulabi ang corruption apan paugat ug pabaga gyud gihapon sa nawong. Unya na mosibat sa Malacañang kun dunay laing People Power ug mga sunod-sunod nga mga coup d’état.
Kanyahay ra nga wa gyud kita molambo ug gikataw-an lang ta sa ubang kanasuran. Dili gyud maulaw sa international community.
Naa pay ubang mga politiko karon nga nagtinguha gyud ug Charter change o pag-usab sa atong Konstitusyon sa tinguha nga mahatagan og dugang lugway ang termino sa Presidente.
Ambot lang kun mao bay kahakog sa gahum o ba kaha nagkuwang pa ang pundo samtang mobalik na unya sa kinabuhing sibilyan.
