Home 
Miulbo akong kaspa niadtong Biyernes sa udto sa dili makiangayon nga pagpangdakop sa taga-City Traffic Operations Management (Citom) sa akong service motorcycle. Paspas kaayong naka-tow ug naka-issue og citation ticket si traffic enforcer Teofilo M. sa motorsiklo nga akong gi-park kilid sa eskwelahan sa akong mga anak diha sa barangay Lahug.
Way tres minutos nga akong gibiyaan ang motorsiklo kay akong gikuha akong duha ka mga anak nga sila Karl Anthony ug Karen sa ilang tagsa-tagsa ka mga lawak kay preparatory ug kindergarten pa intawon ning duha. Na-shock na lang ko kay paggawas nako gibira na ang motor sa mga kanahan.
Miesplikar ko ni traffic enforcer Teofilo sa tinguha nga makahatag siya og konsiderasyon apan igo na lang siyang miingon nga “sorry gyud” kay naisyu na niya ang citation taliwa nga akong gipasabot nga gipanggutom na akong mga tsikiting. Wa koy nahimo. Misakay na lang mi sa ilang sakyanan aron adto ko moprotesta sa ilang buhatan.
Pag-abot namo didto sa Citom, si Teofilo nagsibat-sibat kay dihay pulis nga iya sang nadakpan sa ilang towing operations nga pwerteng sukua nga nakapamulong nga “bawos-bawos lang.” Nagbalik-balik ko sa buhatan ni Mr. Arnel Tancinco aron adto moprotesta apan, matud pas sa iyang mga staff, wa gyud siya didto.
Mi-text ko ni City Councilor Jack Jakosalem isip sakop sa Citom board apan iyang gipasabot nga gibauran silang mga konsehal ni City Mayor Tomas Osmeña nga dili sila maglabot-labot sa towing operations.
Nakadungog kog estorya sa mga Citom personnel nga dunay mga higayon nga ma-release ang na-tow nga sakyanan kun dunay pagtugot nilang Mayor Osmeña ug sa tag-iya sa Road Warriors Towing and Motor Services, nga usa ka private contractor. Tungod kay wa koy kapaingnan kun asa ko moreklamo, mibayad na lang kog P1,600 bisag sakit sa akong buot.
Duha ka resibo ang giisyu sa akoa. Ang una, P1,500, nga towing charge nga giisyu sa Road Warriors. Samtang P100 nga resibo sa City Treasurer kay nakalapas kuno ko sa “no parking or unattended vehicle” policy.
Nakapanglingo-lingo ko sa kabright sa traffic enforcer nga si Teofilo kay unsaon pagka-“unattended vehicle” nga diha ra man intawon ko sa premises sa eskwelahan ug kadiyot ra gyud kaayo to. Diretso lang sab siya og isyu sa citation ticket ug bira sa motorsiklo taliwa nga nibabag pa niya ang ubang mga parents ug mga gwardya sa tunghaan.
Bisan si Councilor Jakosalem, nga akong na-interview, mipasabot gyud kanako nga nasabutan na nila kaniadtu pa sa Citom board meeting nga dili gyud i-tow kadtong mga motor nga naka-park sa kilid sa dalan basta wa lang maka-obstruct sa traffic. Wa gyud ko maka-obstruct sa pedestrian ug sa mga sakyanan kay mingaw nang lugara ug tingpaniudto na sab.
Kun magpirmi ning pagkairesponsable nilang Teofilo, Tancinco ug mga kaubanan, kuyaw nga dunay laing matumba sa Citom kay daghang nainit ning ilang kabuang nga dili kahatag og gamayng konsiderasyon sa publiko. Gani dihay nagpakabana nga mipadayag nga pagkamaayo kunong sampulan sa taga-Citom.
Ang nakaporke pa gyud niini kay sa towing charge nga P1,500, gamay ra ang mapunta niini sa gobyerno kay sa sharing scheme 20 percent lang sa gobyerno. So, sa P1,500 sa matag motorsiklo na ilang ma-tow, ang sa gobyerno P300 ra.
Akong nahibaw-an nga gamay ra ang 200 ka mga motorsiklo ang ilang madakpan matag adlaw. Pwerteng dakua og income ang Road Warriors. Maarang-arang na lang unta kun ang kinatibuk-ang kantidad mapunta gyud sa gobyerno kay di kaayo sakit paminawon.
Gipasabot ni konsehal Jakosalem nga ingon ani ang sharing scheme nga 20 percent ra ang mapunta sa syudad og 80 percent sa Road Warriors sa towing services kay ila tanan sa nauwahi ang gasolina, mga gamit, sakyanan sa pagguroy ug mga personnel.
Akong tan-aw, kaya kaayo kining trabahua sa taga-Citom kay duna tay daghang mga trabahante diha. Gani niadtong Biyernes akong nasaksihan nga relax kaayo ang mga kawani. Naglumba lang padaku sa ilang tiyan. Unya kining towing truck nga kargahan sa mga motor simple kaayog desenyo nga pwedeng himuon sa atong taga-engineering department sa City Hall.
Kinahanglang subayon sab kining maong kontrata nga pirmado nilang Mayor Osmeña ug sa taga-Road Warriors kay akong tan-aw alkansi niini ang syudad. Ambot lang kun wa bay mga opisyales sa City Hall ug taga-Citom nga magbahin sa komisyon sa dakung kita sa Road Warriors niining ilang pagpanakop.
With all due respect, pagkadaghang maayong laki diha sa City Hall. Wa gyud sila makabantay nga disadvantageous ang maong kontrata sa gobyerno? Wa moy huna-huna niini nga ipakanselar ning kontrataha nga giabusuhan sa private contractor ug sa mga Citom personnel nga way alamag ug pasagad lang og hasmag?
