Home 
Goodbye Ayala lang sa tingali ko hangtud mabalik ang ruta sa 04L. Gihimo ko man gud ang Ayala nga akong center of the universe. Tinuod nga two rides kini gikan sa amo sa Mambaling. Apan gikan sa Ayala daw one ride ra ang tanan. Padung sa Banilad Town Center (BTC) o Country Mall, one ride. Padung sa among opisina sa Cebu Daily News (CDN), one ride. Ug kay maagian ra man ang SM paingon sa CDN, one ride ra usab kini. Padung sa Mango Square, one ride. Padung sa JY Square, one ride. Paingon sa Crossroads, one ride. Kon Colon bound ka, one ride ra gihapon. Kon pa IT park ka, one ride ra gihapon pero mobaktas kag gamay gikan sa NFA. (Murag moagi sa tungod ang 04M gikan sa Ayala pero pngitaon kayo kini.)
Ang hinungdan sa akong pagka denizen sa Ayala nga mipahimos ning mga one ride route mao ang akong pagka maniniyot sa lifestyle section ning maong pamantalaan. Ang akong gipanghisgutan nga mga destination maoy kasagarang may kalihukan nga piktyuranan nako.
Mao nga kon wa koy lingaw naa ra ang lago kong hitsura sa Ayala. Lingkud-tindog, saka-kanaug, basa-pasiblat, inom-pangihi, ambush pakals, atang fashion show, huwat og libreng film fest.
Apan karong buwana mo bye-bye Ayala sa ko kay ang pusod nga mo koniktar nako sa among opisina, ang ruta sa 04L gipamub-an man ug gani dili na kini kaabot sa SM kay sa eskina San Jose dela Montana naman kini palikuon.
Sa SM lang sa tingali ko kay duna may mga ruta nga one ride a gikan sa amoa. Kon dunay ipa adto gikan sa SM malagmit two rides kini apan kon wa say sugo one ride ra ang akong sakyan pauli sa amo.
Kimawan akong motambay sa SM. Dili parehas sa Ayala nga nakaila na kos nawong sa mga “see eye” ug mga guard, wa ko ka ila sa mga bantay sa SM ug basig sikupon ko isip suspect tungod sa dili maayo nakong appearance. Hinuon maka browse man ko sa Power Books ug sa Kagnaan pero kon duna koy magazine o libro nga basahon ug wa koy sapi para pangapi murag maikog man ko lingkud sa Bos didto kay di man nako kaila ang mga waiter.
Ambot lag nganong gipangtuli man nila ang mga ruta. Pa hapsay sa traffic? Wa man ko makamatikud nga nakabara ang 04L sa traffic sa SM. Ug sa susamang bahin wa man maghuot ang Colon tungod sa 13C. Ang huot sa Colon mao man ang pikas lane nga pidpid sa McDonalds (ambot kon naa pa ba ang Best Buy Mart nga kuyog ning laraya).
Inig ka gabii hinuon, basta wa nay CITOM maghuot gyud hinuon ning Colon dapit sa Metro apan di man tingali ang 13C maoy hinungdan niini kon dili ang mga paugat man sa mga driver nga anha nas tungas dalan mopundo hangtud nga mapuno.
Ambot kon unsa nay kahimtang sa traffic sa may USC Talamban kay dugay naman kong wa ka adto. Apan ang dakong purwisyo nga wa pa masulbad sa mga taffic enforcers mao ang traffic likuanan paingon sa SRP gikan sa C. Padilla ug sa Highway.
Daw na past tense na ang mga biyahi nga mokonektar sa mga malls ug igo na lang kitang mangagho ug molakaw og pipila ka eskina para sa jeepney nga moagi ra unta sa atong tungod.
