Home 
Si Assistant Provincial Prosecutor Glenda Lupian resident prosecutor sa Argao RTC gireklamo nila ni Thelma Chiong sa Crusade Against Violence (CAV) tungod kay matud pa maoy nang-interest sa kabanay nga namatyan, nga ipasibog ang mga kaso batok sa mga responsable sa krimen.
Si Chiong nga maoy national vice president sa CAV miduso ug reklamo ngadto kang Regional State Prosecutor Fernando Gubalane aron imbestigahon si piskal Lupian.
Sa suwat ni Chiong iyang gi-mention ang duha ka mga kaso nga maoy subject sa ilang reklamo nga mao ang Raul Antig murder case ug Michael Carcasona murder case sa lungsod sa Argao.
Pakyas ko sa pagkuha sa habig ni piskal Lupian sa maong pasangil kay bisag nagbalik-balik ko, wa siya sa ilang buhatan unya akong gitawgan iyang mobile phone makadaghang higayon apan di gyud makontak.
Iyang labaw nga si Provincial Prosecutor Pepita Jane Petralba mi-esplikar nga dunay misunderstanding sa pamilya sa mga biktima ug sa piskal.
Matud pa, nasayop ang pagtoo sa kabanay nga didto midapig si piskal Lupian sa suspetsado sa Carcasona case. Nagsugod ang pagduda dihang giklaro sa piskal ang mga deklarasyon sa asawa nga buhing saksi ug gilalis ang pipila ka mga ponto sa testimoniya atul sa clarificatory hearing.
Gipasabot hinoon ni Petralba nga way katungod si piskal Lupian nga mopahigayon ug preliminary investigation sa Carcasona murder case didto sa Argao hinungdan nga kining maong kaso anaa na sa ilang opisina diha sa Kapitolyo alang sa preliminary investigation.
Misamot kainit kining maong isyu dihang gihimong rason ang "delicadeza" ni piskal Lupian pag-inhibit sa pagpahigayon ug preliminary investigation sa Carcasona case kay ang tinuud sayop si Lupian nga mi-conduct ug preliminary investigation.
Miingon si Petralba nga kadtong mga piskal sa kalungsuran nga maoy mga resident prosecutor igo ra’ng makapahigayon ug inquest proceedings/investigation ug way gahom nga maka-conduct ug preliminary investigation basi sa memorandum ni Secretary Raul Gonzalez.
Nagplano si Petralba nga mopahigayon siya ug seminar sa iyang mga piskal aron tarungon ang pagtratar sa mga pamilya nga biktima sa kaso.
Di ko makabasol sa pagka-sensitibo sa mga pamilya nga maoy kihante kay sila maoy offended party kay namatyan.
Kinahanglang magbantay gyud ang mga piskal sa ilang papel nga dili madudahan nga atua naka-pusta sa akusado aron likayan ang mga pagtoo nga maayo na silang pagkahalin.
* * *
With all due respect, nganong pugson pa gyud ni RTC Executive Judge Fortunato de Gracia Jr. ang prosecution panel pagkonbinse nga mopadayon si Judge Geraldine Faith Econg sa pagbista sa kasong parricide batok kang PBMA supreme master Ruben Ecleo Jr.
Kining tinguha ni Judge De Gracia karong bag-o nga mopatawag ug tigum sa prosekusyon, sa depensa ug kang Judge Econg makapasamot kini ug kalangay sa kaso.
Akong subli-on unfair kaayo kini kang Judge Econg nga atong pugson bisag dili na gyud ganahan ug nakonbinse na sa prosekusyon nga mo-inhibit sa kaso.
Alang nako ang maayong himoon mao nalang gyud ang pag-raffle niining maong kaso aron kini idestino ug bag-ong huwes.
Sayop sab gyud ning estoryaha nga nahurot na ang mga huwes dinhi sa Sugbu pagpa-inhibit sa kaso ni Ecleo.
Pagka-tinuud daghan pa’ng mga huwes nga qualified nga makahupot niining maong kaso sama nila ni RTC Branch 5 Judge Douglas Marigomen, RTC Branch 6 Judge Ester Veloso, RTC Branch 7 Judge Simeon Dumdum Jr., RTC Branch 8 Macaundas Hadjirasul, RTC Branch 10 Judge Soliver Peras, RTC Branch 11 Judge Ramon Daomilas, RTC Branch 12 Judge Estela Alma Singco, RTC Branch 13 Judge Mienrado Paredes, RTC Branch 14 Judge Raphael Yrastorza, RTC Branch 16 Judge Sylvia Paderanga, RTC Branch 17 Judge Silvestre Maamo, RTC Branch 20 Judge Bienvenido Saniel Jr., RTC Branch 21 Judge Eric Menchavez, RTC Branch 22 Judge Manuel Patalinghug, RTC Branch 57 Judge Gabriel Ingles ug RTC Branch 58 Judge Enriqueta Belarmino.
Wa nako apila ang ubang mga huwes tungod kay ang uban kanila naka-inhibit na sa kaso. Samtang ang uban hapit na mo-retire.
Samtang wa sab nako apila si Judge Gilbert Moises kay segurado ko nga mokisi-kisi ang prosecution tungod kay niadtong piskal pa si Judge Moises usa siya sa panel of prosecutors nga mipirma sa resolosyon nga dili ipasaka ang kaso sa husgado ug mirekomendar nga ipabalik sa kapolisan alang sa dugang case build-up.
Manghinaut ko nga maundang na ning sige’g insister nga ipabilin ning kaso diha ni Judge Econg kay tingalig manggawas na sab ning ubang mga pasangil sa huwes nga way igong sukaranan.
