Home 
Nakatilaw na gyud ko’g tagam niining depekto sa ATM (Automated Teller Machine) nga maoy paagi pag-withdraw sa among suweldo sa bangko.
Makapungot kaayo ang akong kasinati-an niadtong Huwebes Santo kay gikalitan lang ug deduct ug balig kinyintos pesos ang pondo sa akong ATM. Wa nako hutda ug withdraw akong suweldo sa Cebu Daily News kay akong gisalin kadto pang-Easter Sunday.
With all due respect, wa ko mamasangil sa among bangko nga mao ang Security Bank nga maoy nasayop pag-deduct.
Niadtong Lunes akong gireklamo sa management sa Security Bank Juan Luna Branch ang akong kasinati-an.
Salamat nga gi-esplikaran ko ug tarong ni Maam Lani Abarintos nga maoy nag-entertain kanako ug iyang gisubay ang akong mga bank transactions sa akong ATM.
Nasubay nga way palpak ang akong mga transaction sa ilang ATM machine.
Nahingangha ko dihang akong nakita sa iyang gi-imprinta nga "Transaction History" nga duna ko’y ATM withdrawal nga balig P510.00 sa ATM machine nga dili ila sa Security Bank.
Mao nga iya ko’ng gitambagan nga ipasubay sa Metrobank diha’ng ako siya’ng gitug-anan nga kanunay ko’ng mogamit sa ATM machine nga iya sa Metrobank gamit ang ATM card sa Security Bank.
Mao nga ako’ng gi-adto sa Metrobank ug magpasalamat sab ko ni Maam Diane Famorcan kay gitarong sab ko niya pagtagad ug gipasabot.
Akong gitug-an kaniya nga ni-anang pagkabuntag sa Huwebes Santo didto ko sa ilang ATM Machine sa Metrobank Gorordo Lahug Branch mi-transact.
Niadtong higayuna mi-process ang ilang machine dihang nag-balance inquiry ko. Apan dihang mi-withdraw ko ug kinyintos pesos, wa gyud kini mo-process ug diha’y instruction sa screen sa machine nga dili siya ka process ug mi-suggest nga adto ko sa akong bangko nga Security Bank.
Sa sirkumstansiya nga akong gi-asoy ngadto ni Maam Diane dali siya’ng nakatuhog ug mi-angkon nga duna gyu’y mga insidente nga mapalpak ang ATM ilabina nga dunay mga deperensiya ang ilang system.
Mao nga iya ko’ng gipa-fill-up ug complaint form aron ma-aksiyunan sa ilang central office sa Manila ug matud pa mabalik sa akong account sa ATM card ang kinyintos pesos sud sa duha ka simana labing dugay.
Ang taga bangko mi-advise kanako nga sa sunod kinahanglang adto nalang gyud mo-direkta ug withdraw sa ATM machine ni-anang bangkoha nga maoy nag-isyu sa ATM card aron malikayan ang mga problema nga ingon ani.
Pero daghan man sab gihapon ang mireklamo nga dunay paltos bisag gihimo ang transaction sa ATM machine sa bangko nga maoy nag-isyu sa ATM card.
Manghinaut ko nga mapangitaan ug masulbad nila kining maong mga kapalpakan aron dili kaayo mahasol ang ilang mga customers.
* * *
Kinahanglang imbistigahon gyud sa mga kadagkuan sa PNP ang kalangay pagtagad sa taga Tabogon Police Station sa ilang piniriso paghatud sa tambalanan nga maoy hinungdan sa kamatayon.
Kun wa mo-grabe ang sakit sa piniriso nga si Paran Andales nga nanghupong ang kalawasan hangtud nga naglisud sa pag-ginhawa dili dad-on sa ospital.
Ang igsoon sa piniriso nga nagbangutan karon nga si Gary Andales mipasangil sa mga pulis sa Tabogon nga matud pa niadto pa’ng buwan sa Enero nagmulo sa sakit ang iyang igsoon nga nag-atubang ug kasong frustrated murder.
Mihangyo siya nga ipahiling sa doktor ni-anang buwan sa Pebrero apan mibalibad ang kapolisan kay kuno nag-drama lang ug sakit ang iyang igsoon aron lang makagawas.
Kun wa mo-grabe niadtong Marso 17 nga Lunes Santo dili madala sa Vicente Sotto Memorial Medical Center ang iyang igsoon. Apan uwahi na ang tanan kay namatay gyud sa gihambing nga sakit.
Gani matud pa ni Gary nga mibalibad pa ang mga pulis nga dalhon dinhi sa Siudad kay way gasolina ang sakyanan. Ug siya maoy mipatubil sa sakyanan.
Kun tinuud man kining alegasyon sobra gyud ka daug-daugan ang taga Tabogon Police niadtong way kaya.
Unsa kaha kun si Ruben Ecleo pa kini’ng maong piniriso? Tan-aw ko maglumba ning mga kanahan sa pag-escort.
Kanyahay ra daghang mag-rebelde niining kalaki sa atong mga otoridad nga mga inutil.
