Home 
Nyor Daku (ND): Asa man nimo makit-an si Kristo?
Nyor Gamay (NG): Sa kasing-kasing sa matag Kristyano.
ND: Yawards!
NG: Bangaan ka nako, Nyor? Katikista gud ko niadtong batan-on pa ta.
ND: Mao ba? Asa pa, Nyor?
NG: Sa buwangan!
ND: Ah, daan pa ko.
NG: Gusto pa kag laing lugar? Sa simbahan. Sa karu.
ND: OK na, Nyor. Pero kahibawo kag diin nako makit-i si Kristo niadtong Domingo sa pagkabanhaw?
NG: Dis-a man, Nyor?
ND: Ubos sa dakong bintana sa karaang balay, dunay bandage ang iyang kamot nga maoy iyang gigiya sa tako sa billiard nga maoy iyang giigo sa puti nga bola.
NG: Nag-billiard si Kristo, Nyor? Daug gyud siyang siguro.
ND: O. Apan katulo una sila magpulipulig pika una napasulod ni Kristo ang katapusang bola.
NG: Time pa, Nyor. Diha kay “mystical vision” o gadamgo lang ka?
ND: Wa ko magdamgo, Nyor. Didto nako makit-i si Kristo ilawum sa dakong bintana sa karaang balay luyo sa simbahan sa Guadalupe nga gipuy-an karon ni Al Evangelio ug maoy headquarters sa Teatro Guadalupe nga maoy tigpasundayag sa Buhing Kalbaryo.
NG: Ug ang Kristo nga imong nakit-an, mao kadtong 18 anyos nga gilansang nga walay anesthesia pagka-Byernes Santo sa tugkaran sa simbahan.
ND: Mao, Nyor. Si Mark Escuyos ang iyang ngan ug ikaduha na kini niyang pagpalansang. Dili hinuon siya ang mialsa sa krus sa kadalanan kay matud pa sa director nga si Al Evangelio, dili na kuno madas lawas kon haguon ka pag paalsa unya ilansang pa ka inig kahuman.
NG: Nakaihi man kunos iyang karsones si Al dihang gimartilyo na ang lansang palapus sa kamot ni Mark Escuyos nga walay anesthesia.
ND: O, Nyor, nakaihi intawon sa kanerbyos. Tesionado na siya dihang duol na ang Kristo nga gadala sa krus (nga si Cloyd Ribo) ug unya wala pa maabot ang anesthesia nga gikan sa technical working committee. Dihang miabot na ang krus sa tugkaran, gipangutana ni Evangelio si Escuyos kon mopadayon ba siya pagpalansang bisag way anesthesia. Si Escuyos nga naa magpuyo ug manginabuhi ni Al, motawag niani og Tatay. Miingon si Escuyos nga magpalansang na lang siya para sa iyang Tatay Al ug nga dili mabulabog ang Buhing Kalbaryo karong tuiga. Nakahibawo na si Al sa bationg sakit sa kamot nga lansangan mao nga miagunto siya sa pagsugod na og dukdok sa lansang nga gipataroy sa palad ni Escuyos, mao nga nakaihi kini.
NG: Sa ato pa, Nyor, maura nadiay og mga anak ni Al kining mga sakop aning Teatro Guadalupe.
ND: Ingon ana gyud, Nyor. Mao nga daku gyud ang kadismaya sa director dihang wa katuman sa ilang katungdanan ang mga sakop sa dakbayan. Apan kay katungdanan man nila ang paghatag og pasundayag sa mga tawo, ilang gipadayun. The show must go on.
NG: Matay, nakaihi sad tingali ang Ginuong Amahan paglansang ni Kristo.
ND: Maura. Di ba nga sa mga salida sa sine miuwan man ug mibagyo pagkahuman?
NG: Tingali, Nyor, makit-an usab nato si Kristo sa matag saad nga gipatuman ug ingon man sa paghatag sa mga tawo sa ilang pipila ka panginahanglan… sama ning pasundayag sa Buhing Kalbaryo.
ND: Maurag maayo na man ka mobatbat ron, Nyor. Sagdi lang kay ipalista tika sa sunod nga Syete Palabras.
