Home 
Kitang tanan miagi man pagkabata. Pero niadto mahimo ra man tang duklon sa atong ginikanan maong wa kayo managko ang atong sungay. Ang problema karon kay di naman diay maka dalidali pag dukol ang mga Awturidad.
Bisag mao ra ang krimen nga nahimo pagka ngan nga minor ang naghimo mas minos kini og silot.
Mas paet sa America diin mas daghan ang limitasyon sa mga ginikanan sa pagda sa ilang anak.
Uyon ako sa prinsipyo nga tagaan og higayon ang mga minor de edad nga maka-usab pa sa ilang kina-iya uban sa pang hinaut nga mamaayo na silang molupyo inig about nila sa hamtung nga panuigon.
Apan samtang ga adjust pa sila sa ilang kinabuhi kinsa may manalipud sa ubang sector sa katilingban batok kanila ug sa ilang mga binuhatan.
Tungod ning maong mga proteksyon sa mga minor de edad mao na kini karon sila ang gihimong frontliner sa mga sendikato. Kay kon madakpan sila adto ra man paingon sa probation.
Usa sa hinungdan niani mao ning pag romanticize sa media sa teen nga daw ang tibuok kalibutan naa magtuyok kanila. Ug kon mahimo pahunongon ang kalibutan kay na-inlove sila.
Sa panahon ni Shakespeare manginum silag hilo kon buwagon. Sa ato magtaban. Apan sa America dunay mopatay sa ilang ginikanan tungod kay mibabag kini sa ilang love life.
Niadto lang miaging adlaw sa gamay nga lungsud sa Alaba, Texas sa America, dunay usa ka batan-ong babaye, nga uban sa iyang uyab ug mga barkada mipatay sa iyang inahan ug mga igsuon sayo sa kaadlawon. Ang iyang amahan naka lingkawas sa kamatayon apan napusilan og ka lima. Dili kini mga delinquent, walay taho nga gikan kini sila sa rehab. Gani gidayeg man kini sa ilang tulonghaan isip mga walay libog nga estudyante. Gani ang babaye aktibo man kaayo sa ilang simbahan. Gibati lang gyud silag ka lami sa ilang love story nga kon kinsa kadtong mobabag kanil ilang ihawon.
Tungod nianing pag palami sa medya sa puppy love, daghang teen pregnancy ang nahitabo. Maayo kon andam na mangapuhan ang ilang ginikanan. Kon wa say trabaho ang ilang ginikanan? Aw, mangawat ang lalake, mamurikat ang babaye. Ug mohapdos na ang tiyan sa ilang mga anak ug wa pa silay nakawat nga ipakaon niani pasimhuton lang sa og rugby.
Kon nagbasa man si Rene Bullecer nianing lindog ta karon, ato siyang ingnon nga dili pornograpiya ang nakadaut sa atong mga batan-on karon kon dili mga love team sa TV. Kay ang kiniyuray nga way bitsin dili ingon ka madanihon sa uyab-uyab nga napuno og toppings.
Daw kanunay nga gipahinamhinam sa mga networks sa mga tam-is nga tinuhikay sa ilang mga teen love-teams ang mga mananan-aw. Balikon ta pag-ingon si Mr. Bullecer nga dili porno maoy problem ug ingon man dili katikismo maoy solusyon niini. Paminusminusi lang ang teen romance sa TV. Timan-i nga dili nga ngil-ad maoy maka-ilad; ang lami maoy makabali. Ug kon mahimo maghimog balaud nga dili ipa-love team ang mga katorse anyos pa.
Kay kon ang porno pay makapabiga nganong minos man ang populasyon sa mga nasud nga mitugot niini.
Samtang nangwarta kining mga estasyunan ginamit ang teen love, nagkadaghan ang mag batan-ong criminal sa atong palibut. Ug kay di man makatabang ang pulis niani (gain basig apil pa ang pulis sa sendikato) dunay uban nga mosugo o mosuhol na lang og laing minor de edad nga mo engkwentro ning mga batan-ong tulisan. Maayo nang sila ray magdinunggabay total puros man sila underage. Kining maong scenario mahimo nang breeding ground sa mga mercenaries ug hit men.
Duna usay gitawag nga Brazilian solution, pang rakrakan lang ang tanang mga batan-on nga magtambay sa dalan sa usa ka drive thru shooting. Gihimo kini sa mga nasud nga Latino dihang dili na mosugal ang mga kapitalista sa gawas hangtud nga wa na silay mga bata nga makit-an sa kadalanan. Dili kini layo nga mahitabo sa ato.
