Pasa-pasa
Nyor Gamay (NG): Ang kinabuhi kuno, Nyor, pasapasa…
Nyor Daku (ND): Unsa man, magpa disguise ka nga chix ka unya makig textmate og mga lonely souls dayon mamaraeg og pasa load? Mao nay gipasabot nimo, Nyor?
NG: Karaang modus na intawon na, Nyor.
ND: A, mao ba? Kon moingon kag karaang style nagpasabot ba nga nagamit na ni nimo og pangilad o ikaw maoy nailad?
NG: Lawgawa gyud nimo, Nyor. Either or ra gyud diay para nimo ang kinabuhi. Wa na lang gyuy observer.
ND: Ana hala. Unsa man diay na obserbahan nimo nga nakaingon ka man nga ang kinabuhi pasapasa?
NG: Kuan, Nyor, ba, tradition ug continuity o pagpadayon sa naandan…
ND: Sama sa Flores de Mayo ug Santa Cruzan?
NG: O. Ug lakip na ang pagpamuno. Gikan hari ngadto sa prinsipe.
ND: Murag naa pa kay hangover sa royal wedding, Nyor, da.
NG: Di lang sa royals, Nyor. Bisan sa contemporary dictators, Nyor. Sama unta sa plano ni Gaddafi ug Mubarak.
ND: Pero na santa man sila, Nyor.
NG: Mao nga for better or for worse na uyog ang ilang kinabuhi ngadto. Nagkaguliyang sila. Apan di lang sa maong klase nga gobyerno, Nyor. Kay bisan sa mga nasud nga dunay election mapasa man gihapon sa ginikanan ngadto sa anak ang gahum. Sama sa mga Bush sa America.
ND: O sa ato mga Aquino ug Macapagal.
NG: Ug mahimong sumpayan, simbako lang, og Ejercito ug Marcos.
ND: Mosimba pa diay ka, Nyor?
NG: Panagsa.
ND: Ug sa local, gikan ni Pablo ngadto ni Gwen Garcia. Pero nakahibawo ka, Nyor, nga daghang klase sa pasa.
NG: O. Kay gawas sa gahum, mapas man sad ang bahandi, abilidad ug sakit, sama sa diabetes ug altapresyon, mapasa man.
ND: Alta presyon! Pagka karaang tao baya nimo, Nyor. Pero duna pakuy laing ipasabot, Nyor.
NG: Sagdi na lang gud. Unsa man diay lain nimong ipahulbot?
ND: Dunay straight pass ug dunay bounce pass. Duna puy long pass.
NG: Wa kay pick and roll? Unsa bitay ipasabot aning imong mga pasa?
ND: Ang bounce pass mao ang pagpasa dili ngadto sa anak o usahay dili gani sa apo kon dili adto na sa sungkod. Sama pananglit ni Willington Burt nga dunay 100 million dihang namatay siya pagka 1919 sa America. Iyang gisuwat sa iyang will nga madawat lang ang iyang bahandi sa iyang mga manununud 21 ka tuig human mamatay ang katapusan niyang apo.
NG: Wayuk! Ug ngano man kuno, Nyor?
ND: Para kuno dili mabuang iyang mga anak sa salapi nga niadtong panahuna mobalor nag kapin sa bilyon. Wa siya magtuo nga makaayo sa ilang kinabuhi ang ingon niadtong kantidad.
NG: Mao ba. Unsa man say long pass.
ND: Ang long pass mao ang pagpasa lang sa posibilidad apan way kasiguruan ang pagtuman. Sama sa gi-ingon nila nga anak ni Bin Laden nga nakaeskapo kuno sa raid. Ilang giingon nga mao kini mopadayon sa pagka terrorista sa iyang amahan.
NG: Sa ato pa ang way olarks maoy long pass.
