Nganong sa CPDRC man gyud? Ipakawat?
Salamat nga mitubag si Marivic Garces, hepe sa Provincial Social Welfare and Development (PSWD) Capitol sa akong column dinhi sa Cebu Daily News nga napublikar niadtong May 2, 2011 bahin sa akong punto nga nagpabaya siya sa iyang trabaho human nakawatan sila og 35 ka sakong bugas NFA rice nga ilang gipundo sa Cebu Provincial Detention and Rehabilitation Center (CPDRC) sa barangay Kalunasan.
With all due respect ngadto ni Garces, wa ko makonbinse sa iyang pagpasabot ug dili ko konbinsido sa iyang gi-impose nga mga precautionary measures ug monitoring system sa mga bugas nga gipanag-iya sa iyang opisina.
Subli-on nako pagpasabot si Garces nga bisan pakyas ko pagtawag ug pagpakigkita kaniya aron kuhaan sa iyang habig, wa ni magpasabot nga iresponsable na ko nga sakop sa prensa.
Insakto na kaayo alang kanako ang mga napublikar ug nabalita sa radyo ug telebisyon kadtong iyang mga katin-awan sa isyu.
Ako sang ipaabot ni Garces nga bisan pa kun ako siyang personalon pag-istorya, di gihapon matuis ang akong unang mga baruganan nga nagmika siya sa iyang pagka-chief sa PSWD Capitol.
Kun seryoso pa siya sa iyang trabaho, makapalusot kaha sa pagpangawat sa 35 ka sakong NFA rice si PG1 Antonieto Babor niadtong April 25 nga iya nang gikiha og qualified theft?
Kun estrikto pa siya sa ilang monitoring sa mga bugas nga ilang gibutang sa CPDRC, nganong nakompirmar man sa report ni Col. Cesar Veloso nga kada buwan diay mopalusot si Babor og tag 20 ka sako?
Ingon ani ba kaisog ug kamangtas si Babor nga usa ka yanong trabahane sa Kapitolyo kun way nagpaluyo? Trabaho kini sa Ombudsman ang pag-utingkay ning maong isyu.
Laing punto nako, nganong si Babor man ang usa sa mga gipiyalan sa mga bugas nga di man siya organic member sa PSWD? Ang trabaho ni Babor mao ra ang pagbantay sa mga piniriso sa CPDRC ngan nga ang iyang item Prison Guard 1 (PG1). Ayaw kog ingna nga kuwang sa mga personnel ang PSWD.
Nganong didto man gipabutang ni Garces sa CPDRC sa Kalunasan ang mga bugas nga unta ang ilang buhatan anaa man sa main building sa Kapitolyo diha sa daan Escario? Gituyo nga didto aron sayon ra pagkawat?
Wa gyud ko kasabot nganong diha gibutang sa CPDRC nga pwerteng hasola sa paghatud ug pagkuha tungod kay lisud kaayo ang agianan gumikan sa kagamay sa kalsada ug tangason kaayo ug kalas sa gasolina.
Pagkadaku og wanang (space) diha sa Capitol compound kun buot gyud ni Garces.
Gawas niini, di ba naandan na man na sa Kapitolyo kaniadto pa nga dunay kasabutan tali sa NFA nga sa panahon nga dunay kalamidad ug mga tabangonon pwedeng makakuha ug bugas sa NFA ang Kapitolyo bisan unsang orasa?
Kun existing pa kining maong kasabutan sa Kapitolyo ug NFA, way rason nga mokuha kita og advance nga bugas sa NFA ug ipundo diha sa CPDRC aron ipakawat.
* * *
Pakaulaw lang sa tibuok Department of Labor and Employment (DOLE-7) si Wilfredo Wagas, usa sa mga hearing officers nga nadakpan sa entrapment operations tungod sa iyang pagpangilkil og kuwarta kang Mr. Johnnie Lim, tag-iya sa Body and Sole ug maoy presidente sa Spa and Wellness Association of Cebu ug director sa Cebu Health and Wellness Council.
Kining mga klaseha sa mga kawani sa gobyerno di maayong hatagan og due process. Kinahanglang taktakon kini dayon.
